Cronfa Mudo

Mae ein cronfa yn canolbwyntio ar sut mae sefydliadau’n gweithio, a beth maent yn ceisio ei gyflawni.

Mae gennym ddiddordeb mewn cyllido sefydliadau y mae eu hegwyddorion a’u harferion yn cyd-fynd â’n gweledigaeth ar gyfer y dyfodol.

Mae hyn yn golygu ein bod am gefnogi sefydliadau sy’n gweithio tuag at:

• ymgorffori arfer gwrth-hiliaeth ar draws eu sefydliad a’u gwaith;
• mabwysiadu diwylliant sefydliadol sy’n canolbwyntio ar ofal a llesiant;
• symud pŵer i fudwyr a chymunedau alltud fel bod eu diddordebau, eu safbwyntiau a’u cyfraniadau wedi’u canoli ar draws gwaith y sefydliad;
• adeiladu undod a chydweithio ar draws cymunedau, tra’n gweithio tuag at newid trawsnewidiol sydd o fudd i bob un ohonom;
• dad-ddysgu a herio’r niwed, yr annhegwch a’r gormes o fewn eu strwythurau trefniadol a’u gwaith;
• dysgu, adfyfyrio a bod yn ymatebol i newid.

Rydym eisiau cefnogi gwaith sy’n helpu:

• adeiladu cymdeithas yn seiliedig ar barch, gofal, a chyd-ddibyniaeth trwy ddatgymalu’r amgylchedd gelyniaethus a chyfreithiau, polisïau ac arferion niweidiol eraill sy’n effeithio’n negyddol ar fudwyr a chymunedau alltud;
• rhoi mewn cyd-destun a mynd i’r afael ag achosion sylfaenol anghyfiawnder y mae ymfudwyr yn ei wynebu, gan adeiladu ar wersi o’n gorffennol i ddatgymalu systemau ehangach o ormes a chysylltu â materion cyfiawnder cymdeithasol eraill;
• adeiladu pŵer ar y cyd o fewn cymunedau mudol trwy lens groestoriadol fel y gallant lunio penderfyniadau sy’n effeithio arnynt a chreu momentwm ar gyfer newid trawsnewidiol a chadarnhaol;
• meithrin undod rhwng cymunedau, gan arwain at well dealltwriaeth a helpu i oresgyn rhaniad;
• cryfhau seilwaith ar gyfer cyfiawnder mudol a meysydd cysylltiedig, gan gynnwys trwy gefnogi mwy o gysylltiad, dysgu a chyfnewid; ac
• archwilio dyfodol amgen wedi’i adeiladu ar hunanbenderfyniad, cyfiawnder, cydnabyddiaeth ac atgyweirio niwed y gorffennol, a lle mae pob un ohonom yn rhydd i ddewis ble rydym yn byw.

Rydym yn cydnabod y cysylltiad pwysig rhwng darparu gwasanaeth a newid trawsnewidiol. Rydym am gefnogi sefydliadau sy’n adeiladu ar eu gwasanaethau i gryfhau perthnasoedd gyda’u cymunedau a llywio eu dull strategol at fynd i’r afael ag achosion sylfaenol yr anghyfiawnderau a wynebir gan gymunedau mudol ac alltud. Fodd bynnag, ni fyddwn yn cyllido darpariaeth gwasanaeth nad yw’n llywio strategaeth y sefydliad yn uniongyrchol tuag at fynd i’r afael ag achosion sylfaenol anghyfiawnder.

Yn ychwanegol at ein heithriadau cyffredinol, ni allwn gyllido ceisiadau ar gyfer:

• darparu gwasanaeth nad yw’n uniongyrchol gysylltiedig â dull strategol y sefydliad o fynd i’r afael ag achosion sylfaenol anghyfiawnder a wynebir gan gymunedau mudol ac alltud;
• gweithgareddau sy’n canolbwyntio’n unig ar ddod â chymunedau at ei gilydd heb gysylltiad uniongyrchol â dull strategol y sefydliad o fynd i’r afael ag achosion sylfaenol anghyfiawnder a wynebir gan gymunedau mudol ac alltud;
• ymchwil academaidd a rhaglenni, gan gynnwys partneriaethau rhwng grwpiau mudol a’r byd academaidd;
• ymchwil nad yw’n dangos cysylltiad uniongyrchol rhwng canfyddiadau a gweithredu tuag at fynd i’r afael ag achosion sylfaenol anghyfiawnder a wynebir gan gymunedau mudol ac alltud;
• gwaith sy’n canolbwyntio ar gefnogi pobl i ymuno â’r farchnad lafur, megis ysgrifennu CVs, paratoi llythyrau eglurhaol, cefnogi cyfweliadau swyddi, ac ati; neu
• dosbarthiadau Saesneg.

Rydym yn cydnabod bod y gweithgareddau hyn yn bwysig ond, o ystyried ein cronfeydd cyfyngedig, nid yw’r gweithgareddau hyn yn flaenoriaeth ar hyn o bryd.